"I chum grad vom Marktplatz. Döt hätt's ä paar sauglatti Siechi gha. Die hend irgendöppis gschnored vo Vertraue, Sicherheit und Schwizer Werte und hend denn Lampiön verteilt. I bi zwor nöd druss cho, was die Lampiön do mit Sicherheit söll z'tue ha. Aber i ha denn gliech eine gno. I ha denkt, vielleicht treffi jo no en Bergler.
Gell, liebi Rorschacherbergler, i ha mis Programm extra kürzt, damit ihr denn no hei chömed, bevor d'Strooselampe lösched. Gell, im Berg lösched d'Strooslampe jetzt neu schon am zwölfi. Also, wenn ihr schpöter unterwegs sind, wöri i noh bim Marktplatz vebii. Döt chön die Ruef-Taxi-Erprobte vom obere Berg ä sone Ruef-Strooslampe go hole."
"Also, wenn z'Rorschach wörkli en Schatz suechsch, denn gosch am Beschte is Kulturlokal Mariaberg. Bisch denn eifach erscht dä viert, wo döt innerhalb vomene Johr dä Tresor chlaut. Schriebsch eifach no es liebs Briefli, äs täg dir leid und denn dörfsch grad nomel bebii. Aber muesch prässiere. Dä Räbsame wött döt ä Flüschter-Seusel-Säg-nüt-Beiz iirichte. Wieso macht er nöd grad ä Ostschwiizer-Tagblatt-Lounge? So mitem Stadtradaktor Bichsel als Barkeeper. Die Beiz wär es richtige immaterielle Schatz. d'Lüt schlofed bim Rorschacherteil ii und Rueh isch. So ä immaterielli Vollnarkose.
Aber z'Rorschach häsch jo eh mengmol s'Gfühl, die ganz Bevölkerig seg innere Vollnarkose. s'öffentlichi Läbe schnarchled. Pffuus guet, chlini Stadt. Egal, was passiert. No Herzbluet for the City."
"Klar keeni d'Lokalpolitiker. Üsi Stadtröt mached jetzt alles, um dörfe anonym z'bliibe. Guet, stimmt so nöd. Git ä Uusnahm. Dä Ronnie Ambaue macht jo jetzt ä Charmeoffensive. Jo, da hockt jetzt is Schaufenschter vom Swisscomshop."
Keine Kommentare:
Kommentar veröffentlichen