Jetz isch grad dä Samichlaus bi mir gsi. So früeh am Morge, woner doch susch erscht amel am Obig chunnt. Dä hät aber gwüsst, dasi en Früehufsteher bi und hät den au no gmeint, daser eso grad auch no die Beizer cha draneh, wo immer no offe hend. Perfekti Planig. Jetzt aber schö dä Reihe no:
Samichlaus: Was tuesch denn du scho so früeh?
I (ganz chlii): Blogge, liebe Samichlaus ...
Vom Umehogger zum Stadtblogger. Echli e trochni Karriere, meinsch nöd au?
Upps ..
Und denn häsch geschter mit dim Blogg grad vieli hässig gmacht. So vo wäge Liecht ablösche und Bummelsunntig und so?
Jo, liebe Samichlaus, i has au venoh ...
Meinsch enart, chönsch do mit dim Blogg no üsi Gwerbler veruggt mache?
Nei,liebe Samichlaus ...
Du muesch üsni Gwerbler echli meh Sorg geh. Die wartet immer no uf dä Ufschwung und so und bine paari liegend halt au d'Nerve blank.
Aua. Da hani so no nöd aglueget, liebe Samichlaus ...
Und wa hoggisch den jetzt plötzli i so komische halbillegale Bare ume? Sind die andere Beize plötzli nüme gut gnueg?
Woher weisch du da jetzt scho, liebe Samichlaus?
I läs äbe no s'Tagblatt. Meh erfahrt also gliech nochli meh do wie i dim Blogg.
Jo, liebe Samichlaus ...
Chum jetzt: wa lauft do a dere Rue du weiss nöd wa?
I weiss au nöd. Aber du weisch doch, liebe Samichlaus, dasi so schregi Sache mag ...
Aha, do häsch di also nöd veänderet? Ha scho echli Angscht gha, vechunsch mer no zumene Schriebtischtäter. Chasch no es Sprüchli?
Uf was mueses sich reime?
Uf Bruno Seelos
Nei Samichlaus, do chani kei Sprüchli.
Denn gits halt kei Nüssli.
Meh cha nöd alles ha im Läbe ...
Aber häsch denn wenigschtens em Sunntig statt die Gwerbler azmache au no öppis kauft do z'Rorschach?
Jo, liebe Samichlaus. Zwei grossi Sache für viel Geld.
Häschder d'Badhütte no ipacke loh?
Nei, liebe Samichlaus, die isch scho ipackt und wartet ufs uspackt wärde.
Also, schrieb witer und machmer aber d'Gwerbler nüme so veruggt. Du weisch jo, dass d'Gwerbler und d'Beizer nöd so viel Spass veliedet.
Jo, da hani am eigene Lieb erfahre, liebe Samichlaus ...
Und wa isch denn domit dem- wie häsches amel geschriebe? - ah jo Kleinstadtpräsident?
Da isch e anderi Gschicht, liebe Samichlaus...
Vezellschmer die denn im nögschte Johr.
Machi gern, liebe Samichlaus ...
Und lohmer die Gwerbler in Rueh!
I probiers, liebe Samichlaus ...
Und vewechsle nüme Blogg und Kolumne und so.
Da got scho gar nüme, liebe Samichlaus ...
Also, machs guet. Do häsch gliech no es Manderinli und es Brügeli.
Danke, liebe Samichlaus...
