C.Bleichi und die Fotomontagen...

Platsch, Jenny und Tschöstin

Eigentlich han i au das Johr wieder wölle mit mim Kolleg, em Platsch cho.
Aber leider nein. Sini Jenny schafft hüt obig. Dä Platsch muess drum hüt em Tschöstin luege. Da isch ihren Bueb. Dä Tschöstin isch es typischs „Christoph Blocher – Basler-Ziitig-Chind“. Als Vater weisch nöd so gnau wie dra beteiliget bisch, direkt oder nume indirekt.

D’Jenny hät jetzt au äs iPhone. Da hät sie immer im Usschnitt. Sie hät ebe ä Push-Äpp.
Letschti hät d’Jenny gjomeret. Du Chris, dä Platsch isch so än Holzpflock. Er hät nöd emol gmerkt, dass I bim Coiffeur gsi bi. Däbi isch dä so tüür gsi. Denn hani gsait: Scho verruckt, wenn mer so öppis nöd gseht! Du häsch würkli en Bessere verdient - aso, en bessere Coiffeur.

Jahr eins

Mir sind jo jetzt im Jahr eins noch em historische Linksrutsch vo dä CVP Ortspartei. Do isch dä Stadtpräsident Thomas Müller ustrete.
Jetzt nind’s üs natürlich wunder, was bisher geschah!

Stöcklistürmer

Aber zerscht zeig ich Eu grad emol mini erscht Erfindig. …
Wer findet ächt use, was das isch?
C.Bleichi bläst mit einem Blasebalg auf ein Blumenstöckli ein.
Richtig: dä ultimativ „Stöcklistürmer“.

Stöcklistürmer, das sind am Thomas Müller sini politische Idol. Sini Leithammel. Also, sini perönliche „Zottel“. Also, z.B. dä Caspar Baader, oder dä Adrian Gopfriedstutz, wie heisst dä scho wieder? Do dä Richard Geere vom Nationalrat. Aso mi erinneret er meh an Johnny Depp. Dä Toni Brunner und natürlich dä Chris Blocher. Die Grinde händ alli am Müller sini Nase. Lieber die als ich. Und denn händ alli wölle Ständerot werde. Aber leider nein. Dä Thomas hätti d’Chance gha zum Ständerat. Also, wenn er i dä CVP bliibe wär, hätti’s vielleicht glanget. Hopp Sanggalle, I d’Schiissi abe gfalle!
Wenn jetzt die Zotteltruppe ä so aaluege, goht’s mer gliich wie em Thomas Müller mit dä GPK vo dä Stadt Rorschach. Da isch doch nume äs Trachtechöörli mit ä paar Gartezwerg.

Gesetz und Ordnung

Rorschach hät neu ä strengi Hand bei Gesetz und Ordnung! Drum git’s jetzt au z’Rorschach so privati Stadtliibwächter, so ä Polizeiattrappe. Aber aufgepasst! Die sind denn nöd wie d’Flüügerbombe vor Staad. Die Sieche sind scharf.
Zum Biispiel üsi singend Schatzsuecheri. Die hät doch emol uf eme Bänkli am See Schatzcharte und anderi Blätter usgleit. Do chunnt en Windstoss und blost ihre die Papier uf dä Bode. Schwups, stönd zwei so Tschuggerdummies do und nämed sie dra:
„Aha! Unerlaubti Abfallentsorgig! Littering! Vollkrass! Nöd guet! Hochi Buess! Mitcho!“
Aber nöd mit dä Camenzind! Plötzlich holt sie Luft, macht uf Operediva und singt ä Arie: Verpissed-Eu!

Schinkebrot

Apropos Schatz. Hät’s au Tunesier do? Und Rorschacherbergler? Wo sind Ihr? Herzlich willkomme, schö, händ Ihr Eu au getraut! Es git jo immer no Rorschacher, wo Eu die Fusionsgeschicht nöd verzeiht händ. Aber Ihr bruuched Rorschach würkli nöd.

Zum das z’bewiese han i das Johr extra für Eu ä Erfindig mitbrocht. So ä Hüüchler-Büx. Wenn mer zum Biispiel ämol z’Rorschach iiglade isch, chamer da mitbringe. Ihr Bergler händ jo bis jetzt kei eigeti Spezialität, so im Sinn vo „Culinarium“ oder “aus der Region für die Region”.
Mir Rorschacher sind do scho viel besser dra: Mandelfisch vom Tschapaun, Fonduemischig vom Kündig oder Reizwösch vo „der wild-rufenden Frau Gehrig“.

D’Rorschacherberglerspezialität chasch selber zämechaufe und i die superschö Hüüchlerbox stecke. Prädikat “In allen Rorschacherbergler Lebensmittelgeschäften gekauft!”: S’Fleisch vom schöne Roseneggmetzger, Brot vom Motzer und dä Parmesan vom Italiener im Bachwiis. Wenn Du denn no äs Salotblättli wötsch, muesch denn halt gliich schnell uf Rorschach.

Seelos und die Badhütte

Apropos Rorschach. Dä Rorschacher Stadtrotchriiber heisst doch See-los. Und so en Seelose lönd die bi dä Wahl zu dä Nochfolg vo üsere Badhütte-Fee ane. Da chunnt jo nume ame „Seelose“ in Sinn, kein Rorschacher als Nochvolger vo dä Maria-Luisa vorzschloh. Da isch jo, wie wenn d’würdsch uf dä Jakobsbrunne ufe en Vadian stelle. Däbii hät mer jo mit dene zwei Randständige Retos Lipp und Kaelli zwei aaständigi Iiheimischi gha. Da wär scho gange. Obe uf em Steg hettet d’Badmeischter Bier gsoffe und une wäred’s abgsoffe.
Im Strandbad git’s jo au en Nochfolger. Dä Fili hät jo da scho gnueg früeh akündet. Da hät er super gmacht. So chasch Di viel länger uf dä Neu freue.

Müller und Kritik

Apropos Kritik. Dä Thomas verzellt jo allne, er segi total kritikfähig. Jo, jo. Dä isch so öppis vo kritikfähig. I seich i d’Hose. Dä cha mit jeder Kritik umgoh, wenn sie vo ihm chunnt oder nöd a ihn goht. Und denn sait er doch im volle Ernscht, sini Kritiker heged’s im Läbe zu nüüt broocht. Dä Platsch hät gsait, so äs Demokratieverständnis isch dermasse Sondermüll, da hätti nöd emol s’Businesshouse entsorgt.

Die anständigen Randständigen ...

Hoi zämä! Mir sind die (R)an(d)ständigä. Sit mer üs üsi Heimat, üsen gliebtä Hafäkiosk jäh weggnoh hät, simmir uf dä Stross. Jo, im Kiosk, döt hemmir immer ächli Wärmi gfundä, mir üsersgliechä & öpä än IV-Schänder – bis äs eines Tages denn aber vil z’warm wordä isch im Kiosk! Etz ziehnd mir amä vo Beiz zu Beiz do z’Rorschach (läck, isch scho guet, hemmir so vil Beizä do, gell!) und hoffäd, dass üs do und döt au ämol öper 1 zahlt – schliesslich hemmir immer au chli öpis z’verzellä us dä Randszenä vo derä sogenannt schönä Hafästadt! Hüt simmir vor allem do, dass ihr alli au chönd do sii – Cliquefasnacht, die wär jo bim ä Hoor gschtorbä, do hend mir gsait, i dem Fall ziehnd mir a dem Obig au durch d’Rorschacher Beizä. Jo, numä wägä eu machäd mir da – wenn’s eu denn am Schluss nöd gfallä hät, denn sinder selber schuld! Wa würäd ihr denn alli süss tue, hüt Obig – ihr alli, wo do im Englers am See, im Rhyfels, im Mariaberg, im Stadthof, im Schnell & garäment au no im Schwizerhof hockäd? So vil wür doch Rorschach gar nöd bütä amä Samschtigobig für eu alli, gell! Und dä René chönnt au nöd so viel Tschatzelis bereit ha im Marabu! Kleider hend mir vo dä Winterhilf übercho – schponsord by Hauser Treuhand!

Mir hend gopfridschtutz kein Kiosk
Mir hend bald ä Raiffisäbank
Mir zwo gsehnd us wien ä Hotel
wo dä Gottfried verreckä loht!

Dä Chabisplatz

Dä Chabisplatz, dä isch jo mengmol verdammt gföhrlich für d’Allgemeinheit wenn döt nöt gad dä Sandhufä vom Thoma mit denä sexy Wieber i dä knappä Hösli stattfindät. Wie heisst da scho wieder? Bitch-Event – ah jo, Bitch Event. Do lauf i im Summer ämol bi dem Parkplatz, wo äbä süss dä Bitch Event isch, vobi – do rasäd doch immer die viereckigä Grinder i denä tüüfgleitä tüürä schnellä gleaste Chärä vobi. Einä hät mi echt fascht umgfahrä, won er quitschend um dä Eggä z’figgä cho isch mit sim Balkan BMW. Won en agluegät ha, maint doch dä :“Hey Altä, was gaffsch man, wodsch ais a dini tum Frässä, man?“ Und vo dem hend do die zwei Mögchtegern-Schmierläppä wo au döt gsi sind - weisch die döt mit dem rotä Büsli mit em 17i druf – wieder kei Kenntnis gnoh. Stattdessä hend doch die nüt gschiders gwüsst, als äm Ober-Zupfer do, weisch äm Niklaus Luuser än Buessäzättel a sin Göppel anä z‘tue, wo dä zum Instrument usladä näbäd dä Paflion gschtellt hät.

Refrain: Mir hend gopfridschtutz kein Kiosk…

Dä Blocher, oder äbä – dä Blogger

Do frogät mit doch vor ä paar Wuchä einä im Zug (bi gad schwarz gfahrä i dä S-Bahn & ha scho Angscht gha, s’seg än Kontrolleur), öb da wohr sei, dass dä Blocher bi üs in Rorschach seg – er hegi da ghört. Do säg i so: dä Blocher, nei da isch keinä vo üs – sowiet simmer gottseidank doch no nöd! Du meinsch wohrschinli dä Blogger – mir hend äbä an Blogger do bi üs z’Rorschach. Da hät denn au nöd jedes Kaff, du! Aber üsen Blocher, äh – etz säg is au no… - üsen Blogger isch än Sozi, aber ganz än tüüf rotä du und kainä vo dä SVP! Isch übrigens än infoffiziells Amt – dä Schtadt-Blogger. Weisch, dä schafft sich sini Ämter mit denä er zunerä so genanntä ‚Person der Öffentlichkeit‘ wird immer selber – wil er no nie für en offiziells Amt gwählt wordä isch. Dä Schtadt-Fotograf isch er übrigens gad au no – weisch au döt vom Rorschacher-Kalender, wo’d weltwiit uf jedem Flughafä chasch chaufä! Jo, mir wünschäd üsem Rorschacher Blocher alläs Gueti für sini witeri politischi Karrierä!

Die Geister aus dem Anker ...

Weltuntergang

Jenny: Da isch so gemein, jetzt hemmer doch em Gottlieb 15 Johr d‘ Stange ghebet, i meine d‘Hütte ghütet und jetzt da. Mier bruched e neui Bar.
Madame Haifisch: . Das ist bar jeder Vernunft sowas, aber was der Gottlieb wohl machen will, ich war doch immer so nett zu ihm...
Jenny: Nett? Wohrschinlich hetter üs drumm usegschosse, welld soooo nett gsi bisch, Mann, äh Frau.... Naja... Hey, was hat er vor? Drohende Weltlage? Brandgefahr?
Du Lilli, viellicht hät‘s ihm ja d‘Frau Hildebrand abkauft, heimlich, als renovationsbedürftigs Überraschungsei für ihren unterbeschäftigte Göttergattä.
Madame Haifisch: Sicher und Herr Blocher samt Weltwoche werden dann Stammgäste im Hafenbüffet. Mit Fernrohr....
Lilly: (Todernst) Weltuntergang.
MH+ J : Was?
Liesl: Ja. am 21.12. 2012 gohd die Welt under: Mayakalender.
Singt: und diese Biene, dich ich meine nennt sich Majaaaa, kleine freche süsse Majaaa, Maaaja, zeigt uns ihre Welt,
Jenny: auch wenn sie nicht mehr lange hält....
Madame Haifisch: Aber das ist unmöglich, die Welt kann nicht untergehen am 21.12.
Lilly: Wieso?
Madame Haifisch: Ich habe am 22. noch eine Friseurtermin.
Jenny: Hey, es git 35 Coiffeursalons z‘ Rorschach, chasch nöd ein früener neh?
Madame Haifisch: Nein, ich will nur zu Bernhaaard....

Lilly: Wir werden alle untergehen.
Jenny: hey, wir nicht
Madame Haifisch: Ah, ja, Silikon schwimmt ja
Jenny: Mier sind Gespenster. unsterblich und so. AH!!! Dä Anker liegt vor Anker, ahaaaa Gotliebgottlieb....... das Lied woni immer gsunge ha hät er wohl ghört.... nöd lache I weiss, wie Rorschach undergoh wird!!!
Lied der Seeräuberjenny aus der Dreigroschenoper:
„Meine Herrn....heute wird ihnen ihr Lachen aufhören, denn die Mauern werden fallen hin, und am dritten Tage ist die Stadt dem Erdboden gleich, nur ein lumpiges Hotel wird verschont von jedem Streich und man fragt, wer wohnt besonderer darin Und ein Schiff, mit acht Segeln und mit fünfzig Kanonen, wird beschiessen die Stadt.....“

Madame Haifisch und Jenny wechseln zu „Ein Schiff wird kommen und das bringt mir den einen“....
Madame Haifisch: Wart wart ich habs, er plant eineie Costa Concordia, nein wie hiess die noch mal, den schwimmenden Swingerclub, jaaa: die Arche Noah.!!

Jenny: jaaaa, denn überall wird abbroche und die Bruchbude stoht immer no- denn wird sie au den Weltundergang und Fusion zur Stadt am See au no überlebe.

Lilly: Wir haben kein Zuhause mehr.
Jenny: „Stimmt. Und do mier jo immer nur im Anker ghocket sind und nie usecho , kenned mier üs i dere Stadt nöd us, gell Madame Haifisch, immer nur im Ghostbook go umesörfe, häsch em Gottlieb nöd e Fründschaftsafrog gschickt? Mier hend üs also anen Ortskundige müese wende, e guete Fründ vo üs, o immer wider zu so genannte histerische, äh historische Recherchezwecke zu üs id Bar cho isch... I han denn em Lily gseit, es söll en Lieb go froge, ob är echt e neui Bar för üs wüssti, sie het do aber e chli öppis falsch verstande...

Treffen mit Otmar Elsener

„I bi de Otmar Elsener i de ganze Stadt bekannt,
bi mol e eifasch Büebli gsi,
hüt schrib i allerhand,
d‘ Stadt Rorschach lit mer hald am Herz, mis Buech das isch en Hit,
vo altem Tobak bricht i gern,
s‘ alt Rorschach läbt no hüt...“

Jenny (als Otmar): Ah, die Piratinnen sind underwägs, sinder usegschosse worde.
Lueg au do, s‘Frölein Lily us em Anker! Söllemer mol wieder e chli zäme im Gäschtebuech blättere??

Lilli hält Otmar die Waffe auf die Brust: Los Alte, ruck e Hütte use!
Otmar: Aber Frölein Lilly, i cha si nöd mit hei neh, wa wör do mini Frau säge- a sie meined i söll ä Ligeschaft sueche i mim Buech?
wie wärs mit: em alte Seehof?
Lilly: Gits nüme, abbroche,
Otmar: Oder em Albert Giger sim Velolade?
Lilly: Gits nüme, Abbroche.

In der Zwischenzeit hat sich MH in einen Jugokiffer verwandelt und schlendert um die Ecke mit einem Riesenjoint:
Madame Haifisch: Ey Aldde, machs kein Stress hey, alles voll easy, tue die Knarre weg hani do volld Lösig.......
Otmar: Au tanke vielmol, dass sie mi grettet hend, sie sind aber nöd vo do oder?
Madame Haifisch: Sicher bini vo da, bini Originalrorschach.
Otmar: Jo aber, i kenn sie jo gar nöd, i kenn doch alli und alles z‘Rorschach, da stoht alls i mim Buech. Viertusig uflage!
MH: Hey voll konkret krasses SJW- Heftli, Allde hanich au viertusig Uflage vo mim Sozialberoter übercho....
Otmar: Tuet mer leid, aber i kenn si würklich nöd!
Madame Haifisch: Mann heissesch du Vergangeheit?
Otmar: Nei, Otmar Elsener, freut mi.
Madame Haifisch: Hey freut mi au Mann, ich heisse Gegewart. Hey Mann, gansch du hai...
Otmar raucht mit: Also ufwidersäh- und i überlegg mer es Tütegschichtli....

Herr Fögeli hat das Wort ...

Die vier Könige der Region Rorschach

jo de vierte könig vo de region
de wött jo unbedingt in kanton
de dritt de hirs wör da au gern
de zweit de müller isch scho z’bern
nu de erscht de würth seit: danke nei
i blieb jetzt lieber wieder dihei.

alli andere die setzed sich i wie d’affe
nei isch de würth plötzlich z’fuhl zom schaffe
vor johre het er jo in kanton wöle goh
zum wohle der gemeinde, jo es isch e so
und jetz wött er nüme, jo do frog ich mich
isch dem s’wohl vo de gemeind jetz eifach gliech.

eigentlich het i au no vom müller sehr gern
öpis verzellt, aber - de isch jo nu z’bern
oder gnüsst für woche, s’isch doch allerhand
a de copa capana, sonne meer und strand
und isch er denn gliech emol dihei underem bergli
denn hocket er nu bi sine gpk – zwergli.

do frogsch di doch scho wer die stadt regiert
isches de deubelbeiss, de ambauen oder - wie heisst nebscht em etterlin no de viert
nei die drü chönds nöd si, i glaubs nöd recht
denn vo dene ghörsch jo nünt, oder denn ghör i schlecht
jo - und bim etterlin, nöd, do mon i halt au säge
jo bi dem chunt halt au oft d’sinnfluet vor em räge -
und so bliebt eigentlich nu no
de seelos bruno

denn han i eigentlich au no ganz weidli
öpis wölle säge zom hirs und em bureweidli
aber öpis säge zum hirs das goht gar nöd guet
well sich bi dem jetzt aber gar nünt reime tuet.

zum würth no öpis säge, wer au no nett
aber wa wötsch zo eim säge, wo nünt z’säge het
denn wenn de öpis seit chunt de müller, stellt klar
de chef vo de region bin ich – ich bi de star!

mit der dreifaltigkeit sei es vorbei
wobi i do nöd die drei könige mein – nei
und au nöd die drü ulme wo gfällt werded bald
nei i meine die hochhüser im städtliwald
jo de müller cha froh sie, gits wenigschtens zwei
süss mösst me denn sege dass er nu einfältig sei -
jo und denn hets im städtliwald underhalb
em peschta wohl kei chue, devör es chalb.

Haben für extrem gute Stimmung gesorgt!

Gestern war der Rheinfels zweitweise fast so etwas wie der Vorort der Hölle. Unglaublich was da abgegangen ist. Vor allem die Musikcliquen hatten es stimmungsmässig in sich. Das war Unterhaltung pur. Herzlichen Dank.

PS: Mit dem weiteren Hochladen von Videos happert es. Mal schauen, ob ich das noch hinkriege.

Kostprobe der Faltefäger

Bei Guggenmusiken happerts in der Regel immer etwas mit der Tonqualität ...