Rorschacher Beizeninfos ...

Grundsätzlich ist ja nur wichtig, dass man die Botschaft versteht ...

Die (R)an(d)ständige

"Do chömäd di (R)an(d)ständige – bi etz grad no i somä Kabeb-Ladä oder wie da heisst ä Pizza Quattro Stazione gsi go fuetterä – und da, obwohl mir z’Rorschach numä drü Bahnhöf hend! Wo isch denn überhaupt dä Ander wieder? Jo chum, isch jo egal – hanen au scho lang nüm gseh. Wird wieder irgendwo einä uf jung machä mit sinä gruusigä langä Fädärä, dä alt huerä Esel! Wohrschinli hockter i dä Badhüttä, dem chaibä Dampfbad! Oder viellicht isch er au im Stadtlift steckä bliebä – gscheht em recht, dem Bergler. Überall numä profitierä, aber nüt zahlä. Wohnä tueter au a dä Wiesästross im Berg, dä Sack und gafft vo sim Balkon obänabä über Grenzä us amä d’Mätch vom FC Rorschach – nota bene ohni än Stutz z’zahlä däfür. Oder viellicht isch er au no zum Mr. Lakeless (Seelos) s’Patent für dä Betrieb vomä Nacktclub für 450 Gäscht a dä Industriestross go hinterleggä. Aber zrugg zum Ässä: wenigschtens chasch am Hafä unä no in Rueh ä koscheri Pizza ässä! I dä Beizä isch jo fang verruckt – do froget’s di z’erscht, wa bisch etz du, än Vegetrarier, än Freeganer, än Frutarier, än Flexitarier, än Pescetarier, än Lacto-Vegetarier, än Veganer, än Afghaner oder än Albaner? Aso i wär am eheschtä no än Paulaner! Etz muen i gliech ämol luegä, wo dä Sürmel wieder steckt!"

"D’Stadt isch nohzue selbschtlos gsi und hät’s würkli guet gmeint mit em Michi Schweizer. Die wiet und breit schönscht Gartäbeiz rund um dä Bodäsee hät er für sies Engler’s am See übercho. Äs goht nüt über ä romantisches Tät a Tät zwüschäd quietschendä Güeterzüg vo dä düütschä Bahn und chrüchendä Autoschlangä dür d‘Hauptstross und da a därä Schtell, wo mir früehner amä no im gliech idyllischä Ambiente ä Büx Pier vorem Hafäkiosk gnossä hend, bevor dä sonän Sack abgfacklät hät!"

"Nochdem’s mi z’Mörschwil, z’Tübach, z’Goldach und im Rorschacherberg nöd hend wöll, bin i halt uf Rorschach cho und bezieh jetzt do so ganz än bescheidenä Sozialhilfe-Bitrag. Aso do goht da denn sehr eifach, hä, gar kei Problem! Ha letschti müesä uf d’Stadtkanzlei go ä Formular usfüllä. Döt hät mi denn da hübsch Fräulein am Schalter – Olga heisst sie glaub und denn hät sie no so än komischä Nochnamä, won i etz nümä weiss – uf die Stüehl döt bi dä Stägä zum wartä verwiesä und gseit, i söll döt mol säb Lokalblättli chli studierä, denn wüss i wenigschtens au chli wa do so laufi i dem Vorort vom Rorschacherberg und vo Goldach, wo schliessli ufchämi für mi. Ä Chrüzwort-Rätsel hät’s au döt innä gha – denn han i halt säb ämol versuecht. Senkrecht: Rorschacher Stadtrat mit 5 Buechstabä – hmmm… - Waagrecht: Präsident Gewerbeverein Rorschach mit 5 Buechstabä – ähhh… - Senkrecht: Präsident des Kirchenverwaltungsrates der Katholischen Kirche Rorschach mit 5 Buechtabä – jo hailanzagg, äs cha doch nöd jedä Habasch z’Rorschach 5 Buechstabä ha! Und Müller hät jo schliesslich mindeschtens 6, also Buechstabä mein i! Waagrecht: Vorstandsmitglied Verein Rorschach+ mit 5 Bueschtabä – etz schiesst’s mi aso langsam a hä, etz lueg i mol wieter unä do! Senkrecht: Gartengerät auf Mundart – Rasä… - Rasä… - RasäMEIER!!! MEIER!!! Aha, etz aber:

Rorschacher Stadtrat mit 5 Buechstabä: MEIER!

Präsident Gewerbeverein Rorschach: MEIER!

Präsident des Kirchenverwaltungsrates der Katholischen Kirche Rorschach: MEIER!

Vorstandsmitglied Verein Rorschach+: MEIER!

Jo, so chamä also au Chöschtä sparä, hä, wenn’s für alläs numä einä bruucht – aber sie johmeräd jo trotzdem all, sie hegäd z’wenig Geld do unä! Chilä-Präsident vo Uznach seger au no – dem Fall au no än chlinä Fremdgänger, üsen Meier.

Vorstellä tuet er sich amä mit: Meier – gross ‚M‘, chli ‚eier‘. Etz hät ihm aber letscht Johr just zur Osterzit sis Göttimeitli bim rammlä dermassä eis verpasst, dass er sich ä Zit lang so hät müesä vorstellä: Meier, chli ,m‘, gross ‚EIER’! Wenigschtens hät er aber nöd no ä Selfie gmacht dävo!"

C. Bleichi

"Die wo mi ä chli kenned, die wüssed, das i sauguet bi dä Fraue aachum. I dä Schwiiz wohned 1.4 Millione Chatze. Da git pro Chatz füüf Mensche. Bi mir isch das Verhältnis grad umgekehrt. I bi sozäge dä Traum vo jeder Schwiegermuetter. Bis jetzt hät mi no kei Schwiegermuetter vo dä Bettkante gstosse. Aber leider passed die mögliche Schwiegermüettere immer weniger i mis Beuteschema."

"Letschti hät so ä verchlemmti Muetter vo some Fiirobigversüessigschätzli mit eme verklärte Silberblick zumer gsait: Chris, wenn i di gseh oder a di denk, mues i immer äs Wort denke, wo im S aafangt und EX ufhört. Du, da got mer gliich, wenn i Di gseh. I denk ad Spitex. O.k., ol.. Dä Witz isch nöd neu, aber dä einzig, wo nöd vo mer isch. Aber bi dem Witz merksch am Lache vo dä Lüt, wer no Sex hät und wer scho nöcher bi dä Spitex isch."

"Mir sind jo im Jahr eins noch dä Plus-Minus-Initiative-Abstimmig. Die Initiative isch jo denkt gsi, dass die drüü Gmeinde emol lueged. ob's würd passe mitenand. Also emol luege, ob's Läbä lang wöttsch mit dere Brut zämä bliibe. Also, enart genau gliich wie bim Sex vor dä Ehe. Aber säged emol Ihr Bergler und Goldacher, wie blöd muess mer i dem Fall sii, dass mer freiwillig uf en floote Drüer verzichtet?"

"Das Rorschach wäg dä Sozialpolitik vom Stadtpräsident so än schlechte Ruef hät, isch doch än Skandal. Däbi isch da wohrschinlich die einzig Stadt wo än Randständige im Schuelrot hockt und dä au no OK-Präsident vom Stadtfescht isch. Und denn isch dä arm Reto Kaelli no än Stadtwaldbewohnter. Und jetzt will dä Kaelli scho wieder zügle. Wägä huusinterne Müllterrorischte. Stelled Eu vor. Die Stadthinderwäldler entsorged ihren Güsel eifach irgendwo im Stadtwald. Zum Biispiel ufeme Abfallcontainer. Aber natürlich nöd im wiissorange Gebührechübelsäck. Wenn da dä Kaelli gseht chunnt er in Dichtestress und wird zum Wuetbürger. Und schribt sine 489 Facebookfründe und fluecht i Grossbuchstabe über dä Müllskandal: Es git scho huere Tuble uf däre Welt. Wer meint er echt? Dä Kaelli hät ä richtigi Güselsackphobie. Badä hät dä Grüsel Gerry, Rorschach dä Güsel Kaelli."

 

Bädmen

"Do hett ich no es Sprüchli!
„Serviert d’Andrea nur im BH mit de Lea
Und hett au Bea nöd vil meh a als d’Andrea
Und tanzed d’Moni obenohni mit de Vroni!
Hockt zmittst in bestimmt de Berlusconi!"

Alles hat eine Ende nur die Wurst hat Bart
Jawohl mein Schatz das ist doch hart

Östreich muss nicht traurirg sein, denn sie singen jetzt daheim, denn…
alles hat ein Ende nur die Wurst hat Bart

Conchita war am Start

Sittestecher

"Grüezi, min Name isch Fischer vo dä Fischer Bettwarefabrik Au-Wädäschwil, am Zürisee. Mir fabriziered nordischi Chüssi und Duvet. Do werdet Federe und Daune vo totä Tier gwäschä, tröchnet, entstaubt und sortiert."

"Es isch erwise: Di Fremde händ üsers Kulturland vewüeschtet. Lueged doch St.Galle n aa! Vo St. Fide bis Winkle: Ei Betonwüeschti. A de Rorschacherstross kein einzige Schrebergarte me. A de Langgass kein einzige Buurehof."

 

"Die Ecopöpeler-Initiative chunt 200 Johr z‘ poht. Do wos us allne 3. Weltkantön i d‘ Städt uusgwandert sind, het mes doch scho möse kontingentiere. Und i dene Entwickligskantön,  wos gjünglet hend wie Karnikel het me möse d‘ Geburte kontrolliere."

"Jede St.Galler, wo uf Herisau greist isch, het möse en Rucksack voll Pariser mitneh und dene zeige, wie mir die aaleit. Hüt wäreds üs dankbar, die chönnted z.B. im Spitolvebund Spese und Sitzigsgelder spare das chlepft. Und jede Zürcher, wo uf Zug gange isch, het sölle mindestens zwei Zuger gümmele, denn chönnted die au hüt no ohni KO Tropfe Sex ha. Jede Genfer, wo is Wallis gange isch, het möse möglichscht vill Igeboreni ziegle. Noch ere wasserdichte Hochrechnig vom Longchamps het denn sogar de Luchs und de Wolf hüt en Überlebenschance. De Longchamps seit zwor au, dass es denn weniger Dôle gäbt. Aber da macht nüüt. I has uusprobiert: En halbe Liter Dôle langet mehr voorig zom zwei  Chäschte ablauge!

Einzig d‘ Innerödler het me chöne sii loh. Die regled ihre Geburte mit Inzucht und uswandere tot sowieso niemer!"

"Häsch viil zviil Arbet im Büro

Bisch total an Aschlag cho.

Wötsch en Usziit – bisch kaputt               

Mach es Selfie – füdleblutt."

Piraten-Jenny und Holzbein-Jack

"In Rorschach i dem Städtli, do het en Wirt es Huus,

Und will er nüme wirte, denn wird schnell en Kebap druss,

Und hesch z‘vil Kebap gfresse,

hesch nur zur Wahl, oh Gruus,

die füfzigscht Fonduestube döt am See jetzt vornedruus.

Merci merci Alexander, Herr Kleger viele Dank,

mit all dem vile Chäs sind mir scho bald halb magechrank,

merci, merci Netzwerk Rorschach, fürd‘ Fonduestube juhee

die tickschte Fisch gsehsch nie im Teller vo de arme Stadt am See."

"A propos Büecher: Die bruched mier eh bald nüme. So wied d‘Ziitig und de Dorftratsch au nöd. Mer hend jo Facebook. De Res Lerch fötelet jede Güselchübel und jedes Wolfordstrümpfli am Treffpunkttisch sowie au jedi abbrochni Baragge. Hesch gwüsst, dass sie underem alte Löwegarte no wend uusgrabige mache? Döt sig de Rorschacher Galge gstande, hend d‘Schatzsuecher verzellt. Da sind so Galööri! Die muesch doch nöd uusgrabe. Die gröschte Galgevögel hocked doch im Roothus!"

"Döt äne am Bergli döt sitzt d Monika,

macht uf panik ohni ende

ohne vill durchblick zha

wirds es minus mit getöse oder wirds echt es plus

vor settige frage isch bi Moni  längst schluss

im politische Garte will sie Neisäger ha

sie pflanzt det am liebschte ihri schpaltpilzli a.

Si häd villne Bürger e klari Sicht versaut

Schad häd de Fred no keis Nebelhüsli baut."

Das wird sicher späterer Nachmittag ...

Eben nach Hause gekommen. Jetzt nur no i d'Federe ...

Die Berichterstattung über die Rorschacher Cliquenfasnacht wird im Verlauf so gegen 16 Uhr auf diesem Blog zu finden sein.