Müll (R) Teil 1

2.    „Ebe, gell!“ (Müller)                                                                            

G: De Thomas Müller, dä würth da mit de Stüre scho gstüret ha ...?

D: Warum?

G: Jo …(Achselzucken)

D: So viel?!

G: Ebe, gell! 

G: De Müller verdient waner nöd verdient!

D: Do scheitlind sich aber d`Geister!

G: Soso.

D: Ebe gell! 

G: De Müller fuchst’s nöd wegem Meier.

D: Soso.

G: Ebe gell! 

G: De Müller!

D: Ebe, gell. 

G: Müll!

D: Ebe.

 

 

3.    Schwizer Depression

 

Brüssel setzt üs mächtig zue,                                                               

dä Steinbrück loht üs nöd in Rue.

Dä Amman flügt au nüme wiit,

d‘ Widmer-Schlumpf agiert nöd gschid.

Üsi Züg sind überfüllt,

im Winter wird no immer güllt.

Dä Janka isch ä lahmi Ente,

chliner wird au üsi Rente.

Dä Hitzfeld zeigt dä Schtinkefinger,

d‘ UBS hät’s au nöd ringer. 

Dä einzig Liechtblick i dä Not

S’einzig sichtbar Morgerot:

Uf dä Ma, do isch Verlass,

er zupft mit Herz de Kontrabass,

er wirkt zwor wienen Portier,

de Emil vo de Heilsarmee.

 

4.    Benedikt (mit Heilig, heilig, heilig) 

Dä Benedikt im Vatikan                                                     

     Liidet a Verfolgigswahn.

Die Selige, die scharret scho,

wänd in Himmel ufecho

als Heiligi im wiise Gwand

mit Posune i dä Hand. 

Selig selig selig – das ist Seelenpein                                          

     Heilig heilig heilig – heilig woll‘n wir sein

Dä Spardruck isch au z’Rom ganz gross                                           

     Benis Gnad isch grenzelos.

Dä Ratzi damol stramm und zack

Spricht heilig grad im Multipack. 

Heilig, heilig, heilig –  jetz simmer im Verein,                               

Heilig, heilig, heilig – Danke Ratzilein!

 

 

 

5.    Berlusconi

D’ Libido vom Berlusconi                                                                  

     isch under üs gsait  - gar nöd ohni.

Bunga bunga mit Ernesta,

Lolita, Rubi und Francesca.

 

S’Gsicht wird immer straff und straffer,                                               

    dä Sack hingege schlaff und schlaffer.

Vorig Huut hät’s überall,

da haut em denn scho uf d’Moral.

Doch näbeddra hät’s vil Substanz

wägem Silikon im Schwanz.

 

 

 

6.    Francesco Schettino Costa Concordia (Melodie Caprifischer) 

Wenn bi Gilgio die stolz Concordia im Meer versinkt                       

     Dä Schettino total verzwieflet noch Wörter ringt.

„I mue rette di barca costa was es will,                                            

     wenn versufe denn mit courage - diä mit Zivil“.

S’Schiff isch kippet und dä Francesco i sinre Not

gheit per Zuefall „Oh Dio mio“ is Rettigsboot .

„Bin i frei, i gangi hei, wa gsehni dai

Papparazzi, Polizei. 

Mamma mia, mamma mia,                                                               

     ho perduto tutto, jetzt chumi dra.

Mamma mia, mamma mia,

jetz chum i dra. 

Schiff leer, ich habe fertig!  (dieser Satz gesprochen)   

                   

7.    Hirzel -Denkmal: Bahnhoflift 

Am Bahnhof z’Rorschach schtoht es Teil,                                          

     no unvollendet zwor.

Es fählt no s‘ Denkmol -  er fänd’s geil!  -

vom Peter Hirz‘ dävor.

 

 

 

8.    „Postfrosch“ 

Jo wer isch blau, wiss und rot?                                                            

     Jo wer chunt immer ä chli z’schpot?

Es isch de Janka, es isch de Janka,

de Jaaaanka. 

Jo wer trait au Schi und gumpt hinedri?                                            

     Jo wer trait Ski und gumpt hinedri?

Es isch de dopplet Doppelsieger Simi A.,

dä hät - au scho besseri Flugzite gha

 

Jo wer schtigt uf d’Bühni ue und singt?                                               

     Jo wer trifft de Ton nur bedingt?

Sie isch nöd vil wüeschter ohni ihren Helm,               

     die mumifizierti Skirakete us Elm. 

Und wer heisst Felix Baumgartner und flügt ohni aschnalle?           

    Jo wer heisst Felix Baumgartner und isch völlig am dureknalle?

Es isch de Baumgartner Felix vo Arbon am Bodesee,

wer en Überschallbrille het, het en vilicht scho mol gseh!

Es isch de Baumgartner Felix, da weiss jo jedes Chind,

sit do hät er goppel en Überschallknall i sim Grind.

9.    Halbschuh-Preisverleihung                                                          

 

Mini Dame und Herre

Mir chömed zom Höhepunkt vom hütige’ n Obed
Zur Veleihig vom goldige Halbschue

 

Mir händ sehr vil Bewerbige gha

(wa üs nöd wiiter überrascht het bi dere Halbschuedichti)

de goldig Halbschue wird überreicht dere Rorschacheri oder dem Rorschacher, wo sich im letschte Johr nochhaltig för d’ Roirschacher Kultur, Wirtschaft, oder Politik iigsetzt het. 

Mir Jurymitglieder händs nöd eifach gha! 

Ganz knapp a de Räng vebiigschrammt isch de Res Lerch mit sim unstillbare Mitteiligsbedürfnis i Wort und Bild. 

Ebefalls en Achtigserfolg het de Jürg Moser erziilet mit sim destruktive Wachhundjournalismus. 

Nöd ganz gschafft hets au de Peter Fuchs (i de Jury hät em nu ei Stimm gfählt).

Mit sinere Abwahl loht er de positive entwicklig vo Rorschach Tür und Tor offe. Langwilig segs em nöd, seit er, er heg scho vor de Pensionierig no nie en richtige Uftrag gha! 

Und jetz chömmemer uf de Punkt, mini Dame und Herre. Es goht gad um zwei Persone, wo schlicht überall no öppis Guets finded. 

Si händs sicher verrote, de Halbschue in Bronce goht an

Richi Lehner und d'Barbara Camenzind

 

I warte nu druf, dass die no d’ Ruth Gerig als Schatz entdecked! 

Fascht hets em för de goldig glanget

För siis 2 stündige engagierte Plädoyer im NR för s’ Plasticsäckliverbot

Und för sini Reforme und Innovatione. 

De silbrig Halbschue för de Thomas Müller!

Aber ehm gemmer nu gad en ledrige, so wiemmer de kenned, versilberet er denn dä scho selber. 

Jo, und so innovativ ischer eigentli scho lang nüme. Er isch jo scho sit über zwo Johr i de gliiche Partei! 

För sini konstruktiv Leserbriefmitarbet speziell im Baumschutz und i de Abfallentsorgig, ganz klare Sieger und dodemit rechtmässige Träger vom goldige Halbschue isch:

De Chime Hueber, Präsident und Vorzeigewonneproppen vo de serbelnde STADT AM SEE Fusions SP.

B – R – A – V – O 

Die (R)an(d)ständigen Teil 1

Hoi zäme, mir sind di (R)an(d)ständige – da heisst, i bi jo ällei – weiss au nöd, wo dä Ander wieder isch. Jo nu, mol luegä, viellicht taucht er jo no uf und süss isch aso würkli au gar nöd schlimm! Hender au scho parkiert i därä Tüüfgarasch vo dä neue Migros? Do hät d’Stadt jo echt wieder emol öpis guets gleischtet! Aber huerä Siech – äs seicht und rünnt jo dermassä döt ine, dass bald nume no mit emäAmphibie-Fahrzüg, Gummistiefel und Schnorchel chasch döt ine fahrä! Jo, Rorschach isch au süss ä chli ä gföhrlichi Stadt – bsunders am See, do muesch äfang ständig dämit rechne, dass der no än Flüger uf dä Grind abe ghait - und da nöd nur im Herbscht! 

‚Gopfertami Siech, hailanzagg, alles Arschlöcher, Schiessdräck, abfahrä mit dem huerä Pack – sölled ihren huerä Dreck mol selber machä!‘ (Reto K. kommt als Frau W. (mit Perrücke) verspätet rein). ‚So, bis emol ruehig! Häsch d’Medikament wieder nöd gnoh?  Oder bisch äs du, Reto?‘‚Nei, äbä nöd – aber i glaub, da häsch jo selber checkt, du Arschloch!‘ 

Nöd dur dä Wald 

Sorry für d’Verschpötig – ha äbä no müese dur de Wald. Obwohl i als Bueb us de Chaschperli-Platte scho gwüsst ha, dass me nöd sött dur de Wald. So hät da amä tönt: – Tra tra trallala, tra tra trallala, de Chasperli isch wieder do, de Chasperli isch do. Sinder alli da? Das han i doch gwüsst! Und wänder alli öpis luschtigs ghöre? Ebä, das han i doch au gwüsst!Potz Holzöpfel und Zipfelchappä! Ich gang etz mit em Gritli zum Groosi mit emä Lupf de Gugel vo dä Wieber, äh nei mit eme Wiiberigugelhupf  – aber s‘Grosi hät gsait, mir sölled nöd durch de Wald, das sig vil z‘gföhrli! Aber dä Polderi, dä Hagel hät gsait: Moll Chäschpi, mir gönd glich durch de Wald – das isch en Abchürzig und mir chömäd no bi de Hex Hinkebei im Zauberwald verbie – ha ha ha haaa!!! Oder dä Falco hät gsungä: ‚Tschini komm, steh auf, wir müssen weg hier – raus aus dem Wald…‘ Hät alläs nüt gnützt, i bi glich dur dä Wald, dur dä Stadtwald… 

Dä Fuchs 

Im Wald bin i no em Fuchs begegnet. Nochdem dä Fuchs us em Stadtrot verbannt worde isch, hends im Stadtwald neue Läbensruum für ihn gschaffe (dä WWF, s’Conny Land und CVP heged da Projekt unterstützt). So isch dä Fuchs aso vom Stadtrot in Stadtwald – und da wohrschinli senkrecht mit em Stadtlift! Am Waldrand – oder zur einfachere Orientierig für Alt-Rorschacher (dä Wald gits jo nonig lang) bim Marabu – isch mer ufgfalle, dass dä Fuchs ä Stimmgable i de Schnauze gha hät. Do han i denkt, hailanzagg wieso schliecht etz dä Fuchs mit ere Stimmgable durch Bäum vom Stadtwald? Bis mer denn dämmeret hät, dass dä Siech jo wohrschinli immer noch die Stimm suecht, won em am 23igschte September gfählt hät! 

Refrain (Melodie von ‚De Doo Doo Doo, De Da Da Da‘ von The Police) 

De Doo Doo Doo, De Da Da Da – dä Stapi isch en guete Maa!

De Doo Doo Doo, De Da Da Da –drum muen er au viel Franke ha! 

Dä Meier 

Etz hemmer däfür dä Meier – än asteckend engagierte, so wie er sich selber huestet. Dä einzig, wo mit eme Plakat in Wahlkampf gstiege isch, wie natürlich als allererschte dä Lerch bemerkt hät! Und genau dä Lerch isch au dä, wo genau weiss, hinder wellere öffentliche Schiessi no hüt ä längscht verblassts Meier-Wahlplakat hangät! Wenigschtens hät de Meier nöd nume sin eigene Grind uf em Plakat gha – nei, er hät rund ume no ä paar anderi Glön (Clowns) abbilde loh. Sogar ä GPK-Kandidatin und än Schuelrots-Kandidat vo dä FDP seged druf gsi. Läck, am Janthi Hippmann schient jo au äfang alles schiesse gliech z’sie, sit er im Berg obe wohnt! En brave christliche Kerli, de Meier – Präsident vo de katholische Chile und glaubt schiens a die unbefleckt Emfpängnis. Oder häsch en du scho mol im Marabu oder im Pascha gseh? Ä riese Latte hät er, äh i mein natürli ISCH er au! Gad öpe so gross, wie wenn dä Ambauen uf em Seelos wür stoh!Und mönd nu luege – dä isch ä sooo asteckend engagiert, dä wird etz i dä Stadtrots Sitzige dä Deubelbauen, dä Ambeiss, dä Etter und dä Müllerlin ame ghörig under dä Tisch schnorrä! Und en schöne söll er gad au no sie – bi mol im Rhyfels gsi won er ine cho isch und d’Moni Thoma i Begeisterigs-Extase verfalle isch: ‚Läck, etz chunnt no dä Meier – du bisch so än schöne Maa, aber ganz än schöne Maa bisch etz du!‘Aber lömmer en etz – dä Meier wird da scho recht mache! Dä isch jo so ehrgiezig, dass er sich scho im Bundesrots-Zimmer, wenn nöd gad im Oval Office gsieht! Go for Rorschach, Meier – go! 

Refrain De Doo Doo Doo, De Da Da Da…                            

Von Otto’s zu Reto’s 

Üsi guet alt Brauerei Löwegarte – wäred jo schöni Gebäude, so quasi s’igangsportal zu Rorschach vo Weschte her. Etz isch es aber völlig abecho, da Areal und gsieht gröber abgfackt us. Zum wohre Schandfleck isch es worde – chönntsch maine, es ghöri em Gottlieb Kündig! Dä Lidl chäm döt ine, häts gheissä – da wär dä Hammer gsi, denn hättämer en wietere Ladä gha, wo mä Pierbüggse zum Sozialhilfe-Tarif überchunnt. Aber nei, än Piergartä gäbs etz döt! Aber wartäd nume – Rorschach chunnt scho no zur Beherbergig vonerä Billigchetti-Filialä! Nochdem letscht Summer dä Otto Ineichen, dä Gründer vo Otto’s d’Finkä abgeh hät, hend mir zwei denkt, mir chönnted jo dä Lade überneh. Am Konzept hemmer ä Bitzeli öpis modifiziert – demächscht werded mir in Rorschach die erscht Filiale uftue! -> Trainerjacke ausziehen & Reto’s T-Shirt zeigen!

Übrigens, waisch wer für üses Logo Modell gschtandä isch? Dä Ottmar Hitzfeld! 

Dä Müller 

(Handy fibriert im Hosesack) Hallo, wer isch dra? Müller? Da cha jo jede säge – Müller, Meier, Huber, Bostic – so cha jo jedä heisse do z’Rorschach! Wa, di sött i kenne? Ah moll, vo dir han i au scho ghört – du bisch doch dä wo d’Schnauze voll gha hät do und uf Brasilie hät wölle uswandere! Jo, da hätti dir so passt – a de Capacobono go dä Wackelärsch nohluege und üs do em Schicksal ällei überloh, wo du agrichtet häsch! Müller, mue etz ufhenke – ha no z’tue, läb jo schliesslich nöd vo Rationalnots-Gelder oder wie da heisst! Hä? Ah so, Nationalrots-Gelder – dä Legasteniker do, wo ame bim Denner Durchgang sini Löwebräu Büggse für 50 Rappe ine chlepft, schient mi langsam azsteckä! Und uf die Nationalrots-Gelder chömäd no bescheideni 185 Tuusig  Schtei vo dä Stadt Rorschach obä druf – do bliebt denn nüme veil übrig für üs IV Schänder! Und hoffentli gohsch amä au z’Rorschach go Kleider und Chopfwehtablette poschte mit dine 12 Mill Repräsentations-Schpesä! Mues etz ufhenke – tschau, gell! 

Refrain De Doo Doo Doo, De Da Da Da… 

Fahnä 24

Üs sägäds amä immer, mir hegäd ständig ä Fahnä. Däbie isch da gar nöd so schlimm! I kenn einä, dä hät 24 Schtund ä Fahnä – dä Fahnä 24!Fahnä Vierezwänzg – ich ha das erfunde, ich de Rosche Schawinski – hu kärs!Nei, da isch definitiv nöd de Schawinski gsi – da isch uf em Wendelin sim Mischt gwachsä! Vo wägä gwachsä: gwachsä wär dä Wendelin vermuetli au ganz gern ämol i sim Läbä! 

Badhütte 

Uf uf uf uf!!! Waisch wa isch da? Muettertags-Ständli i de Badhütte! Dä neu Badhütte-Wirt, dä Schwufelberger, hät zum Ischtand und Muettertag gad dermasse ä Chill-Out Party inszeniert, dass bim Monsieur A im Schlofzimmer znacht am Elfi no Doppelverglasig vo dä Fenster fibriert hät. Do druf abä hät denn üsen seelose Stadtrieber aber dick müese istecke. Aber es mues jo öpis los sie am See – süss wärs jo gopfertami seelos do! 

Refrain De Doo Doo Doo, De Da Da Da…

C. Bleichi Teil 1

Hellau, Alle Jahre wieder! Da isch jo wie heicho! Rorschach, yes we can! 

Kei Angscht! Fraue! I ha min Beziehigsstatus nöd gänderet. I bi immer no z’ha für wild, quick änd dörty. Mit andere Worte: mit Herreteppich isch für Willigi immer noch frei begehbar! Gell, do inne wörsch jetzt grad gern au ä chli chräuele. Dä Nuggiferrari do hät nüt mit mir z’tue. Da isch nume jo säged mer ämol ä temporäri Persönlichkeitsstörig. Do inne lieht Jelica, äh nei Jessica. S’Neuschti Gadget vo mine Kollege dä Jenny und em Platsch – und i bi dä Götti. Chasch jo nöd guet nei säge, wenn Di scho emol öppert froget. Aber die Chind gänd eim jo soooo viel zrugg. 

Chömmer schnell en chliine Soundcheck mache? Wichtig isch jo, dass mi au d’Rorschacherbergler guet ghöred. I rüef „Echo“ und Ihr müend eifach zrugg rüefe.

„Echo“. Jo super! S’Echo vom Rorschacherberg isch glich nöd abgschafft worde. 

Für die wo mi nöd kenned, i bi dä Chris Bleichi, also dä C.Bleichi. Als Chind en absolute Seich, wenn Du gliich heissisch, wie ä Haltestell vom Heidnerbähnli. I dä Schuel händ d’Lehrer immer gsait, muesch halt s’Zahrad inetue bim denke. I bi dä Rorschacher Bachelor. I säge aber nöd: Ich schenke Dir eine Rose. I säg amel: Ich reiche Dir meine Hose – Merci fürs Bögle. I bi eigentlich äs Rorschacher Kulturguet. Wenn i denn emol d’Churve chratz, chönd Ihr au mini Chleider is Chornhuusmuseum henke. 

Jenny und dä Plätsch händ jetzt zwei Chind. Tschöstin und jetzt ebe Jelica, äh Jessica. I säg zwor immer Tschöstin isch kein Name, das isch ä POS-Diagnose.

Jessica isch dä Bewiis vo dä Nochhaltigkeit vo Kuschelgottesdienscht. Jenny und Platsch verhüetet katholisch. So noch eme Motto: us dä Chile, bevor s’Jakobsglöggli lüütet. Aber i glob s’hät do bim Platsch eifach z’früeh glütet. Uf jede Fall hät d’Jenny dä Platsch wölle Chrüzige, wil er zspot us dä Chile ustrete isch. Aber jetzt hät sie glich au chli Freud a dä Jessica.

Zwei Chind isch scho brutal streng. Die chönd zum Biispiel nüme duurepenne. Und wenn die d’Lippe ufenand drucked, sind’s nöd liideschaftlich am küsse sondern sie sind sich gegesitig am Wiederbelebe. Jo, jo. Die Chind gänd eim halt au eifach viel zrugg.

Was gnau? Da wüssed’s ebe au nöd. 

Jenny hät mi letschti gfroget, öb i denn kei eigenti Chind wöll. I ha denn gsait: Los emol. Erschtens weiss i gar nöd, öb i nöd irgendwo eigeti Chind han. Zweitens und gilt bi mir d’Spielregle: Wer’s Chind überchunnt dörfs bhalte. Da isch mir süscht en z’heisse. 

 

Seegfrörni

Jo apropos heiss. Wa händ dä Herbert Grönemeyer und d’Seegförni gmeinsam?

Exakt hüt isch jo s’Jubiläum füfzg Johr Seegfrörni. Z’Münschterlinge fiiret’s da mit ere Prozession. Und z’Rorschach. Mir händ jo Fasnacht . Aber mer stossed jetzt aa mitenenad und singed ein Prosit auf die Seegfrörni!

Die Seegfröni muesch natürlich fiire, bevor alli wo da no erlebt händ, unterirdischi Iiszäpfe sind! Dank em Hermi Fuhrima und em Gerd Oberdorfer macht mer im Do-it-yourself-Museum im Chornhuus ä Sonderusstellig. Und händ Ihr Eu au scho emol überleiht, i welli Johresziit so ä Usstellig mit em Titel EISZEIT logischerwiis passt? Richtig! Zmitzt im Summer. Mer wär jo gschiider mit dere Usstellig direkt i d’Badhütte. Denn chöndsch i dä Badhösli Föteli mit Schlittschuehläufer aaluege.

Und wieso Grönemeyer? Bim Grönemeyer chasch zmitzt im Winter mit Chappe und Händsche i d’Chelle a s’Open-Air. D’Verastalter händ gsait, sie wönd äs Konzert im intime Rahme mache. Sie hoffed nume öppe uf 10'000 Fans. Jo, 10'000. Dem säg i au intime Rahme. Wenn denn die Fans nur nöd no alli aafanged mitenand kuschle. Gell Jelica, äh Jessica. Mir zwei wüssed, was bi so Kuschelverastaltige usechunnt. Wir wissen um die Sünde! 

 

Fusion

Ihr wüssed jo, ich beobachte ufmerksam, d’Entwicklig vo „Stadt am See“. Total en däpäte Name: „Statt am See“ Jo, wo denn suscht?  

Aso fusioniert händ jo zum Biispiel d’Füürwehre

und d’SP

Jetzt chasch Di eifach froge, wo hät’s jetzt meh Schlüüch. 

Teamwörk händ Rorschach und dä Bärg au bim Bahnhofslift gmacht. Aber i glaub, d’Bergler händ eifach zwenig zahlt. Dä Lift gseht jo us wie ä Sprungschanze am Holmenkollen. Aber in Würklichkeit isch er ä richtigi Bergler-Abschussrampe. Une im Bahnhof ine, mit em Lift go Aalauf hole, obe use – und tätsch liesch uf dä Promenadestross under eme Charre!

Jo jo, liebi Bergler, kei Fusion, kein Fuessgängerstreife. 

Au d’Rorschacherbergler Raiffisebank isch uf Rorschach cho. Aber chönd Ihr mir erkläre, warum die do une i dä Stadt so ä Trutzburg baue händ? Dä Chalt Chrieg isch vorbii. Grenze sind offe.

Da Huus gseht jo us, wie än Ersatz für dä abgrisse Bunker döt use bim Würth. Ziemlich sehr viel meh Schirm als Scharm. Die neu Bank begrüesst üsi Gäscht und Tourischte jo öppe so fründlich, wie früehner dä Velo Giger ame schlechte Tag. 

Bildung

Apropos fründlich. D’Luft zwüsched em Sanggaller Bildigsdirektor und dä Lehrer stinkt - öppe äso wie dä erscht Rossfurz nochere Köllik.

D’Lehrer händ jetzt aagfange ihri Husufgabe selber abzschaffe und korrigiered zum Biispiel nume no d’Hälfti. Jetzt goht au no d’Impulsschuel zue. 

Darum habe ich begriffen, Bildung ist eine Marktlücke. I ha begriffe: s’Zahrad ischalte bim denke. I gang drum jetzt öppe emol i d’Volkshochschuel. D’Volkshochschuel chan ich Eu nume empfehle. Die schat nüt. Döt wirsch nur gschiider. Und wenn i do inne so umelueg. Do inne hät au no öppe ein ä chli Luft geg ufe oder andersch gsait Luft do inne.  Aso, i ha gmerkt, dass i viel schläuer bi, als dass i selber denkt hett. 

I möchte Eu drum jetzt zeige, was i im Kurs „Mathematik im Nebenamt“ glernt han. 

Zum Beispiel Rechnen.

Cervelat

Do händ mir die folgendi Ufgob glöst:

In einer kleinen Stadt am See produziert Metzger Forster eine Rekordwurstkette mit 199’520 Cervelats.

a) Wie lange ist diese Wurstkette, wenn ein Cervelat 15cm lang ist?

b) Wie teuer ist die Kette, wenn ein Cervelat Fr. 1.60 kostet?

c) Wie teuer wäre die Kette, wenn man sie aus viel billigeren Migros-Budget Cervelats à 90 Rappen wurschten würde? 

I habe das jetzt für Euch schon ausgerechnet.

a) Die Wurstkette ist 30 Kilometer lang. Da isch vo do bis uf Münschterlinge. Da isch jetzt ebe döt, wo’s hüt die Seegfrörniprozession mached. Nähmt mi no wunder, wie das usgseht, wenn die döt alli übers Wasser laufed.

b) Die Wurstkette kostet 319'232 Franke! 319'232 Franke? Komisch die Zahl chunnt mir jetzt aber bekannt vor. Das isch jo genau soviel wie Weltwuche usegfunde hät, dass dä Stadtpräsident überchunnt. Nöd meh und au nöd minder.

c) Mit Migrosbudget-Cervelat kostet die Wurstkette billige 185'000.--.  Das isch jetzt aber en Zuefall. Dä Tagblatt Hofpoet Hirtl hät berechnet, dass d’Rorschacher Stüürzahler für ihren Stadtpräsident genau 185'000 zahled. Aso nöd schlecht! Für das Geld git’s also ziemlich viel Wurscht! Jo und im Rorschacherberg? Döt sind d’Würscht billiger – aber däfür nöd so Cervelat-prominent.  

Aber es isch gemein, dass mir immer uf dem Lohn vo üsem Stadtpräsident umehacked. Er git üs jo sooo viel zrugg. Und trotz em Lohn langet’s ihm jo glich nöd. Wenn er und sini Frau vo Brasilie heiflüged, chönd’s nöd emol näbed änenand hogge. D’Maureen sitzt hine und trinkt i dä Economic es stills Wässerli us em Plastikbecherli und dä Thomas nippt gliichzititig a sim Cüpli vorne i dä Business-Class. Nei, nei! Die Gschicht stimmt natürlich so nöd. Dä Thomas suft au die Business lieber Bier.

Stelled Eu vor, wenn das soo wiiter goht. Da isch dä Aafang vo türkische Verhältnis. S’nöchschte Mol sitzt denn Maureen mit eme Chopftuech im Flüger. Und s’übernöchschte Mol hockt dä Thomas i dä Firstclass und d’Maureen trait ihri Koffere selber - ufs Schiff.

Piratinnen@Anker Teil 1

Pirate-Jenny, von Madame Haifisch und Totenkopflilli verlassen, hat im Hotel Anker überwintern dürfen. Leider ist ihre Gesprensterbar geschlossen worden, wegen Nutzungsverbot, deshalb musste sie sich auf andere „Einnahmequellen“ besinnen... Ergebnis: Sie ist hochschwanger und hat, um nicht zum Sozialfall zu werden den Job gefasst, Stadtführungen für „besondere“ Neuzuzüger anzubieten.  

Jenny‘s Lied: Übers Meer sind wir gesegelt, bis zum Haus dort, ohne Licht

und wir wohnen im Hotel Anker, wir verlassen es doch nicht.

Denn Herr Kündig hat nicht gekündigt,

wir Piraten sind drum froh

fällt ein Balken aus der Decke

schlägt uns doch nicht k.o. 

Rorschachs prominentester Neuzuzüger, Hans Niederer hatte keine Freude an seiner Stadtführerin, Jenny wundert sich etwas darüber, aber egal. Dafür hat sie jetzt einen „echten“, keinen aus „Bosnien-Halleluija“, wie sie meint, sondern einen Züri-Pirat, genannt Käpt‘n Jack Holzbein.  

Der geklaute Hafenkran:

Also, min  Käptn Holzbein gesht so us: Humpelt freche Schnauze, schüsst gern us volle rohr gäg die Stadt, obwohl er sie nöd kennt, wohrschindli müend am Zentralfriedhof emol zwei Gräber usghobe werde, eis fürs Holzbei und eis fürd Schnure, und wüsseder, woni dä s‘erschti mol troffe ha? bi mer am Hafe. Dä hät welle üsen Hafechran stäle, wells Z‘züri jetzt e so eine umsverrecke ufstelle wend. Kunscht. seg da. aha...  

Zucht und Ordnung in Rorschach:

Jack: Öppis flüssigs hani welle, aber so abgwrackt, wie du da uf kurs bisch, hani eher öppis überflüssigs. 

Jenny: Vo wäge abgwrackt... i bin ä Frau i de beschte Johre, du Limmatflundere und i bin froh, dass ich endlich uf de „rechti Wäg“ cho bin. I gründe ä Familie, (Zückt SVP- Flugblatt) und i bi froh, wenn Zucht und Aastand in Rorschach wider gschätzt wirt!  

Jack: Dänn söttsch aber mit dinere Büüle zerscht emal im toneli brunner sim „haus zur freiheit“ umelungere. Wer häd die überhaupt zschtand bracht? Ich ha doch zvill zucker und du zvill eiwiss, das gid ja höchstens meringue-schale. Aber eigentli heds ja jede chönne sie. I dere schadt isch ja jede schtiifer als mis bei. 

Kampf der SVP gegen den Familien- Artikel, das tiefgefrorene Tagblatt, die Bankenblase und Maria Hubers Interpellation wegen der Würth- Steuern:

Jenny: also... wele meinsch jetzt?(singt) Die zahl der Freier iiiist frei, wer kann sie erraten.... Hey, Käptn, mein Käptn, au wenn mi de Gottlieb Kündig no im Anker het lo wohne, er isches nöd gsi, i bin doch jetzt seriös und i han tenkt, d‘SVP sorget denn scho guet für mis unehelichs, lueg emol uf die Bildli, die hend super Chindertagesstätte im Aagebot! 

Jack: Egal, wer mini Fregatte belade häd: Gahts um din Buuch, wirdi ruuch (Jack geht mit dem Messer auf sie los und lässt den Bauch platzen).  

Jack: Total erstaunt: Da isch jo nur es laus Lüftli drin gsi!  

Jenny: Hey Jack, gohts enart no! Du chasch doch nöd mitem Messer ufmi los!! I hans doch nur gmacht wied Banke: Da sind au nur Freibeuter imene seriöse Aazug und lönd sich vom Staat rette. Au wenns nur Blose produziered! Und jetzt isch si platzt! 

Jack: Ich platz jetz dänn au grad, und wenn nöd ufhörsch mit dim Freier-Gschwafel, wird mini Wuet so iischalt, dass mi s Tagblatt chan i ihri Seegfrörni-Serie iibaue! 

Jenny: Eifach cool bliibe, Jack, gell. Apropos Blootere, da isch jo, öppe eso wie de SP- Hueberi ihri Blootere im Kantonsrot wäge de Stüüre vom Würth.  

Jenny zieht Mantel, Kopftuch etc. aus und klettert auf den Tresen: (Auf: „Völker, hört die Signale“:)  Rorschach, hört die Signaale, die SP zieht ins Gefeeecht.  Wir haben keine Aaahnung, aber meckern dann erst reeecht! 

Christoph Mörgeli kommt nach Rorschacherberg

Jack: Wölle häd au de mörgeli wölle. Diräkter bliiibe im Medizinische Institut, woner als Brächmittel sbeschte Uuusstelligsschtuck wär. De Typ heisst jetzt künftig Öbigli, well sis SVP-Sünneli am verglüeh isch. 

Jenny& Jacks Mörgeli- Lied:

Oh Mörgeli, oh Mörgeli, ich hett gern dini Sörgeli... im hinderletschte Chämmerli, do fuxets di ganz jämmerli, oh Mörgeli, oh Mörgeli, i hett gern dini Sörgeli.

Oh Stöffeli, oh Stöffeli, dini chnöche fuulet öffentli. De Raachegreis us Herrliberg de häd kei Freud, a dier du Zwerg, o Stöffeli, oh Stöffeli, dini Chnöche fuulet öffentli.  

Jack: Hesch gwüsst, dass de Spritchopf Mörgeli en neue Job häd? Als Jaguar-Fan wird er für die Marke Importeur für rechtsgschtüüreti Modell. Und für sich elei forderet er mit ere Volksabstimmig en eigeni schpur uf em Seeuferweg vo Rorschach noch Staad. Im Rorschacherberg zeigeds sich zuegänglich: „Lieber Blindgänger als Fuessgänger“, hed de Ruedi Hirtl letzschti gschribe. 

Die wahre Identität von Käptn Holzbeins  Papagei:

Jack: Da isch D Reinkarnation vo sämtliche bisherige Rorschacher Schtadt-Politiker. Er seid immers glliche: Brabbel, brabbel, brabbel, hauptsach en grosse Schnabel. 

Sexuelle Belästigung von Journalistinnen und der teure Stadtpräsident:

Jenny: Ahhhh.... jo. (a Part: Maaannnoo, de Züripirat machtmi völlig fertig) Käptn Jack Holzbei, du bisch neu do i dere Stadt und ich än aaaaständigi Anker-Piratin und ich hans immer guet gha mit dene woz Rorschach  öppis i de Hose, pardon, d‘Hose aahend... also de Thomas und ich.... 

Jack: Dass de Thomas Mäuse gern häd, ischmer klar. Aber ich han immer gmeint, die siged us Papier mit grosse zahle druff. Und wenn mit dem öppis hesch, schick em e Bodesee-Nachrichte-Journalischtin uf de Hals, wo wartet, bis er en blöde Dirndl-Schpruch macht. 

Jenny: haaachhh... ich wär jo sooogern mol sexuell beläschtigt... uuund...(zu einem im Publikum:) bisch du miis... Brüederle?

Cliquentexte ...

Bei den jetzt dann veröffentlichten Cliquentexten handelt es sich immer um den Originaltext der jeweiligen Gruppen. Es kann aber durchaus sein, dass dieser Text in den verschiedenen Beizen aktualisiert und/oder den Gegebenheiten angepasst wurde.

In gut zwei Stunden geht's los !!

Das Rorschacher Cliquenfieber steigt und trotz angekündigter Kältenacht werden in den Rorschacher Beizen subtropische Temperaturen herrschen. Freuen wir uns ein paar ganz gemütliche Stunden!

Ich werde versuchen, am Sonntag so um die Mittagszeit auf diesem Blog die ersten Bilder und Texte und allenfalls auch Videosequenzen zu veröffentlichen. Je nach Länge der Beiträge kann es dann aber sein, dass ich diese unterteile. Das könnte dann heissen, dass ein erster Teil der Berichte am Sonntag und der Rest dann am Montag veröffentlicht wird. Mal schauen.

Auf jeden Fall werden die Bilder dann um die Mittagszeit auf auf meinem Facebookkonto zu finden sein. Und jetzt geht's ab in den Rheinfels ...

SP-Standaktion

Die SP Rorschach Stadt am See hat heute auf dem Platz vor der Migros eine Standaktion durchgeführt und für ein Ja zur Abzocker-Initiative, ein Ja zum Raumplanungsgesetz und ein Ja zum Familienartikel geworben.