Parkplatz
"z'Rorschach werded jo die Parkplätz bi dä Migros bald zue gmacht und denn goht jo wieder das Parkplatzkarusell los. Zum guete Glück händ mir die Trischlitüüfgarage duregwunke. Wenn mer so wenig Geld hät, wie d'Stadt, isches meh wie recht, wenn mer das langfrischtig i Parkhüser investiert. I säg immer, lieber ä rächts Parkhuus als ä Oberstufeschuelhus. Säg emol, wo sölli ime Schulhuus min Celica anestelle? Sicher nöd i dä Buebegarderobe, oder? Mer chönnt jo d'Obertsufe eingentlich ganz abschaffe und die eint Hälfti vo dä Schüeler i d'Fahrschuel und die ander Hälfti i d'Baumschuel schicke. d'Fahrschüeler würded denn Parkplätz bruuche und d'Baumschüeler chönnted echli Stadtwald spiele. Die Tüüfgarage isch jo es Abgas vom Stadtrot. Nochdem er jo scho em Korecki bim Seerestaurant Parkplätz überloh hät und em Würth Bruefsschueltüüfgarage abgeh hät, brucht er neui Werbegschenkli für dütschi Stüürhunderzieher, wo z'Rorschach wönd investiere..."
Jakobsbrunnenglöckner
"Dä Wisi Ambauen vo dä technische Betrieb hät jo d'Idee gha, dasmer d'Glogge bim Jakobsbrunne währed dä Pilgerziit wieder söll vo Hand lüüte. Er hät denn äs paar Glöckner dö Notro Rorschach gsuecht. I bi denn au a das Casting: Rorschach sucht den Superglöckner". Dä Stadtrot Peter Fuchs isch im Fall au döt gsi. Aber gell, schon noch dä erschte Züüg am Strang sait dä Wisi zu mir: "Leider Nein! Chis, Du häsch z'viel Zupf. Mit dir als Glöckner hettet mir eiszwei vo dä IG Stiller ä Sammelchlag am Hals. Als Glöckner dörfsch uf kein Fall dynamisch si". Dä Peter Fuchs isch denn Superglöckner worde..."
Hafenbeleuchtung
"Dä Stadtpräsident hät jo bi dä Entflammig vo dä Hafebelüchtig gsait, sie bringi äs "südländisch Amdiente" i d'Hafestadt. Super! Da händ mir jo au ohne Liechtsanduhre a dä Fassade gschafft. "Willsch Dürüm mit oder ohni scharf?" Aber recht hät dä Stadtpräsident jo scho! Rorschach isch fascht wie Venedig. d'Hafebelüchtig gsieht us, wie än Pavillion a dä Bienale, vom Markplatz weg d'Ankerstross dürab Richtig Chornhuus flüsst neu dä Canale Grande und Tuube schisst eim jo scho lang uf Kappe..."
Post
"Apropos Post. Isch echt das würklich die neu Farb vo de Poscht? Die geseht us wie an Roschtschutz. Die Farb isch jo "eine optische Grenzerfahrung". Poscht hät jo jetzt au es neus Spiel igführt: Schalterverloserlis. Muesch jetzt bim inecho es Zetteli mit eme Nümmerli zieh. Äs git im Fall Bergler, die nemet das Zetteli sofort is Muul wil si meined, das seg es Fusionslos..."
